O libro da rehabilitación integral do IES Valle-Inclán en Pontevedra xa é unha realidade. A publicación recolle a historia deste emblemático instituto e documenta o proceso de reforma executado por Construcciones Ramírez entre 2023 e 2025. O volume preséntase como unha homenaxe ao edificio e á memoria educativa da cidade, cun enfoque histórico, arquitectónico e visual.
O proxecto, adxudicado pola Xunta de Galicia cun investimento superior aos 6 millóns de euros, permitiu recuperar o esplendor dun centro que é considerado unha das catedrais educativas do país. A obra supuxo unha intervención complexa, tanto polo seu valor patrimonial como polo feito de estar en funcionamento durante toda a rehabilitación.
O libro inclúe unha ampla reportaxe fotográfica do antes, durante e despois das obras, realizada por David Freire e Javier Cervera-Mercadillo. Ademais, recolle a investigación histórica do xornalista Rafael López Torre, que analiza o longo camiño do instituto desde a súa primeira pedra en 1905 ata a inauguración en 1927. Complétase cun artigo técnico do arquitecto Alfredo Díaz Grande, director do proxecto e antigo alumno do centro, no que explica as claves da intervención e o seu valor arquitectónico.
A publicación busca conservar a memoria dun edificio esencial para Pontevedra e recoñecer o traballo conxunto de profesionais, administracións e comunidade educativa, así como o compromiso de Construcciones Ramírez coa rehabilitación do patrimonio histórico e cultural da cidade.
