A rehabilitación interior da Casa Consistorial de Pontevedra vén de recibir o Premio de Arquitectura e Rehabilitación de Galicia 2025. O galardón recoñece unha intervención que recupera a esencia do edificio histórico e, ao mesmo tempo, mellora a accesibilidade e a funcionalidade dos seus espazos.
O proxecto foi deseñado polos arquitectos María Gracia Amandi e Jorge de Uña. Pola súa parte, Construcciones Ramírez, executou a obra con rigor técnico e co máximo respecto polo valor patrimonial do inmoble, obra orixinal de Alejandro Sesmero. Ademais, o Concello de Pontevedra e o seu persoal técnico tiveron un papel fundamental, xa que acompañaron e supervisaron todo o proceso.
O xurado salientou que se trata dunha reforma “de calidade”, capaz de realzar a beleza do edificio e ofrecer un espazo funcional, luminoso e acorde ás necesidades actuais dun servizo público esencial.
Durante o acto de entrega, a conselleira de Vivenda e Planificación de Infraestruturas, María Martínez Allegue, destacou o talento da arquitectura galega e puxo en valor o papel das empresas e profesionais comprometidos coa rehabilitación e a conservación do patrimonio.
Esta quinta edición dos premios recoñeceu tamén outras intervencións destacadas en Galicia, como o ascensor Halo de Vigo, a reforma do centro de saúde do Porriño ou un edificio de vivendas en Santa Marta, xunto coas traxectorias de profesionais de referencia na arquitectura galega.
